Türkmen halkyma

Gyrmyzy T.

Oturma tümlükde eý türkmen halkym,

Taýýarlady Reb saňa merhemet ýolun,

Garaşma, eglenme, eý meniň halkym,

Kabul et, Taňrynyň bu beren ýolun!

Merhemet – bu saňa berlen sowgatdyr,

Muzdyna hiç zat töleýän dälsiň,

Diňe ynam bilen Taňra aýtgyn sen,

«Merhemetiňi aýyrma Sen men bendeden!»

Diýseň ýeterlikdir Taňry Isama:

«Bagyşla, günämi geç, men günäkäri,

Huzuryňa getirgil, bütin kowmymy,

Ata-baba, etdik biz ähli günäni!»

Bagyşlaýjy Taňrym bagyşlar seni,

Elleri ýaraly Mesihim meniň,

Her bir türkmen, eline alsyn Injili,

Öwrensin Taňrymdan gelen Kelamy!

Oturma tümlükde eý, türkmen halkym!

Reb Isany kabul et, gadyrly halkym!

Mesih bilen durmuş garaşýar saňa,

Jennetiň gapysy açylar saňa!

Garaşýaryn Saňa

Gyrmyzy T.

Garaşýaryn Saňa Eý Perwerdigär,

Gelsene, çöllüge gelen Ýaz kimin,

Garaşýaryn Saňa Eziz Halasgär,

Ömrümiň Bahary, Beýik Hudaýym!

Ýüregimiň töründe Ornuň bar Isam,

Halasgärim meniň Ýalkaýjymsyň Sen!

Öýümiň içini Saňa niýetledim,

Howandarym meniň, Arkadagymsyň Sen!

Ýüzümi göterip Saňa bakýaryn,

Ellerim galdyryp Seni öwýärin!

Ömrümiň Guwanjy Sensiň Hudaýym,

Ýeketägim, Ýalňyzym, Eziz Hudaýym!

Şalaryň Şasy Seni öwerin,

Durmuşymda, oýumda hem aňymda,

Mähribanym Gudratly Isa Mesihim,

Mukaddesleriň Şasy Beýik Hudaýym!

Garaşýaryn Saňa Eý Beýik Isam,

Garaşýaryn günde Seniň geljegiňe,

Ynamda berk durup haçy götermäge,

Taňrym günde güýç ber ýeňip geçmäge!

Söýgiň Seniň näzikdir

Gyrmyzy T.

Söýgiň Seniň näzikdir Eý, Taňrym meniň,

Sen hem mynasypsyň söýgime meniň,

Öwgülerim diňe Saňa degişli,

Kabul etseň aýdaryn kän alkyş Saňa!

Kabul etseň aýdaryn alkyşlar Saňa,

Ýüregimden çykýan öwgüler Saňa,

Adyňy Beýgeltjek bütin ýerlerde,

Hormatlap, şöhratlar aýdaryn Saňa!

Her gün Seni taryplap, aýtsam men öwgi,

Mynasyp Sen alkyşa Isa Mesihim,

Öwgüler diňe, diňe Seniňki,

Bökdäp bilmez hiç bir güýç Saňa öwgümi!

Söýgiň Seniň näzikdir, Reb Isam meniň,

Jar ederin Söýgüňi Taňrym Mesihim!

Ýerde demim durýança öwerin Seni,

Ebedilikde-de Reb men öwjek Seni!

Hudaýa alkyş

Gyrmyzy T.

Alkyşlaýan Atam Seni,

Rehmiň üçin, Söýgiň üçin,

Merhemetiň dolady meni,

Alkyşlaryn Atam Seni!

Öwýärin men Halasgäri,

Isa Rebbim, Taňrym Seni,

Günäli ýere geleniň üçin,

Şöhratlajak bütinleý Seni!

Mukaddes Ruh öwýän Seni,

Taňrydan gelen Sowgatsyň Sen,

Köşeşdiriji, Ruhlandyryjy,

Gaýta-gaýta öwjek Seni!

Taňrym Saňa minnetdar men

Şatlygymyň Çeşmesi Sen,

Üç Birlikdäki Ýeketäk Hudaý

Ýene-ýene öwjek Seni!

Sygyndygym Sensiň meniň,

Arzuwym hem buýsanjymsyň,

Göklerdäki Beýik Hudaý,

Her demimde öwjek Seni!

 Aýdym aýdalyň Beýik Hudaýa

Gyrmyzy T.

Aýdym aýdalyň Beýik Hudaýa,

Isa Mesih Rebbimize,

Mukaddes Ruh Dostumyza,

Her bir dilde, her bir aňda.

Alkyşlara, şöhratlara,

Mynasypdyr Hudaýymyz,

Aýdymlara, nagmalara,

Garaşýandyr Hudaýymyz.

Aýdym aýtmaga wagt ýetdi,

Ata, Ogla, Mukaddes Ruha,

Oýan türkmen, pursat geldi,

Beýik Hudaýy taryplamaga!

       Taňry Isa ynan sen!

      Gyrmyzy T.

      Göklerden geldi Hoş Habar,

     Beýik Hudaýyň Sözünde,

     Mukaddes Kitaby okasaň,

     Düşünersiň muňa sen.

      Düşünmek üçin dileg et,

      Hudaý saňa görkezsin,

      Diňe şeýdip bilersiň,

      Beýik Hudaýyň islegin.

      Halas bolmak Isada,

      Başga hakykat ýok ýerde,

      Ata barýan ýeketäk ýol,

      Taňry Isanyň Özünde.

      Beýik Hudaýyň islegi,

      Taňry Isa ynan sen,

      Günäden halas bol sen,

      Erbet ýollaryň goý sen!

             ÝARADYJY

       Gyrmyzy T.

       Ir säher oýanan guşlara bakyň,

      Näme üçin saýraýar, kimi wasp edýär?

      Olar öz dilinde Ýaradyjynyň,

      Kimdigin wasp edýär, Oňa saýraýar!

         Guşlar bilýär Kim ýaratdy olary,

         Bu üçin waspyn edýär säherden.

         Ynsan bilýärmikä öz Ýaradyjysyn?

         Ýa-da unutdymy bu soraglary?

    Ynsany ýaradan Hudaýdyr biliň,

     Unutmaň dostlarym, oýlanyň bu gün.

     Ýerde berlendir mümkinçilik muňa,

     Ynanyň dostlarym, goýmaň ertire.

         Ynsany ýaratdy Ol Öz keşbinde,

         Akyl, paýhas, aň  berdi Ol ynsana,

         Ynsan bolsa aladalaryň içinde,

         Mümkin unudandyr öz Ýaradylyşyn?!

     Guşlardan alalyň gowy mysaly,

     Wasp edeliň biz hem Beýik Hudaýy!

     Diňe Ol mynasyp alkyşlarymyza!

     Unutmalyň Ýaradyjy Hudaýy!

                Mesih bilen...

      Gyrmyzy T.

      Ýüregim howsala düşüp başlanda,

       Unutmaryn hiç Mesih men bilen.

       Ýa-da şatlykdan böküp başlasa,

       Unudyp bolarmy Mesih men bilen.

         Ýok, ýok! Beýle zat bolyp biljek däl.

         Aklyma, aňyma girip biljek däl.

         Mesihe ynanan günümden başlap,

         Terk etmejegin söz berdi asyl.

      Mesihden rahatlyk bolar ýürekde,

      Diňe ýürekde däl- janda, bedende.

      Ýüregiň tabşyrsaň Isa Mesihe,

      Şatlyk höküm sürer her bir  ýürekde.

                    Kimdir biri...

    Gyrmyzy T.

   Kimdir biri gapy kakýar ýuwaşja,

   Howlukmaç däl, gyssagly däl, näzijek.

   Açsaň gapyňy bolar bir myhman,

   Ýa-da bolar Dost, ýa-da Hojaýyn!

      Gapyňy açaňda diýersiň özüň:

      Myhmanmy, Dostmy, Maslahatçymy?

      Ýa-da kynçylykdaky Söhbetdeşiňmi?

      Muny özüň saýlap, seçip bilersiň!

   Gapyny kakýan - Isa Mesihdi,

   Gudraty Güýçliniň Ýeketäk Ogly.

   Haçda ölüp, üçünji gün direlen

   Ata Hudaýyň Söýgüli, Ýeketäk Ogly!

     Näme saýlajagyňa garaşýar saňa,

     Täzeden durmuşy Ol berjek saňa,

     Gurply, bagtly durmuş isleseň,

     Ýüregiň gapysyn çalt aç Oňa sen!

      Ýanyňa barsam

    U.K.

Mukaddes Taňrym Isam,

Eger men ýanyňa barsam,

Çüý kakylan elleriňi görsem,

We aýaklaryňy ogşasam,

Şonda bolardym iň bagtly,

Mukaddes Huzuryňda baky.

Mukaddes Taňrym Isam,

Eger men ýanyňa barsam,

Hudaý Atamy hem görsem,

Dyza çöküp aglasam,

Şonda bolardym iň bagtly,

Mukaddes Huzuryňda baky.

Mukaddes Taňrym Isam,

Eger men ýanyňa barsam,

Altyn Şäherde bolsam,

We taýýar öýümi görsem,

Şonda bolardym iň bagtly,

Mukaddes Huzuryňda baky.

Mukaddes Taňrym Isam,

Eger men ýanyňa barsam,

Şan-Söhratyňy görsem,

We Göklerde dem alsam,

Şonda bolardym men bagtly,

Mukaddes Huzuryňda baky.

Mukaddes Taňrym Isam,

Eger men ýanyňa barsam,

Mukaddesler bilen bile bolsam,

Hem horda Saňa aýdym aýtsam,

Şonda bolardym men bagtly,

Mukaddes Huzuryňda baky.

Mukaddes Taňrym Isam,

Eger men ýanyňa barsam,

Onda Sen ýatla meni,

We Huzuryňa al meni,

Şonda bolaryn men bagtly,

Mukaddes Huzuryňda baky.

Hudaýyň goragy

U.K.

Hudaýyň söýgüsi meni gurşaýar,

Taňrymyň elleri meni goraýar,

Hudaýyň Ruhy meni doldurýar,

Onuň gözleri maňa seredýär.

Näme etsem-de ýeterli däldir,

Öwgülerim Saňa belki-de azdyr,

Edýän hyzmatym hem hiç doldurmaýandyr,

Çünki Özüň Sen meni doldurýarsyň.

Nirä gitsem-de Reb Sen meň bilensiň,

Her ädimimde meni goraýarsyň,

Ýollarymy öňünden Sen görýärsiň,

Erbetlikden bütinleý goraýarsyň.

Meniň Sen güýjümsiň, Halasgärimsiň,

Durmuşymda goraýan Galkanymsyň,

Her ýagdaýda Reb Isam berk Gaýamsyň,

Ebedilik gizlenýän Sen Binamsyň.

Şeýtan oklaryndan Sen meni ýapýarsyň,

Adam güýjünden Sen meni goraýarsyň,

Sen meni ýanyň bilen alyp barýarsyň,

Ebedi öýüme hem Sen meni eltersiň!

Meniň Şirin Janymsyň

U.K.

Meniň şirin Janymsyň,

Ýüregimiň Barysyň,

Durmuşymyň Nanysyň,

Sen söýgüli Mesihimsiň!

Meniň şirin Janymsyň,

Damarda akýan Ganymsyň,

Başymyň gymmat Täjisiň,

Tutuş barlygymyň Çeşmesisiň.

Meniň şirin Janymsyň,

Ýaşaýyş berýän Demimsiň,

Maňa gerek Suwumsyň,

Sen söýgüli Mesihimsiň!

Meniň şirin Janymsyň,

Dodagymda Balymsyň,

Dilimde Sen Narymsyň,

Ýüregimde Sazymsyň.

Meniň şirin Janymsyň,

Hemişe boljak Barlygymsyň,

Ebedilige eltjek Serdarymsyň,

Sen söýgüli Mesihimsiň!

Öwret Rebbim bagyşlamagy

U.K.

Öwret Rebbim maňa bagyşlamagy,

Ýürekden aýyr Sen gahar-gazaby,

Adam uruş bilen gelen mahaly,

Ýüregime ber Sen Parahatylygyňy.

Öwret Rebbim maňa bagyşlamagy,

Adam maňa töhmet atan mahaly,

Adam üstümden gülen mahaly,

Saňa seredeýin men şol kyn wagty.

Öwret Rebbim maňa bagyşlamagy,

Erbetlik edýän maňa her bir ynsany,

Yzymdan gybat edip ýören adamy,

Meni ýykjak bolýan her bir ynsany.

Öwret Rebbim maňa bagyşlamagy,

Aldaýany hem-de howp atýany,

Garşylygyma uly maslahat edýäni,

Pikirlenip ýykmaga çalyşýanlary.

Öwret Rebbim maňa bagyşlamagy,

Bagyşlamaýan ýoldan ýöremezligi,

Birek-birege şypa, pata bermegi,

Ýürekden çykarmaga Atyr Ysyňy!

Öwret Rebbim maňa bagyşlamagy,

Hemmeleri Seň ýaly bagyşlap bilmegi,

Erbetlikden gaça durup bilmegi,

Ebedilige her gün taýýar bolmagy!

Öwret Rebbim maňa bagyşlamagy,

Ebedilik hakda pikirlenmegi,

Mukaddes Ruhuňdan doldurdyň meni,

Jar edeýin men Seniň Baky Sözüňi!

Öwret Rebbim maňa bagyşlamagy,

Senden öwrenýän men bagyşlamagy,

Söýgidir, mähriňden doldurdyň meni,

Bergidarym bagyşlap, öwerin Seni!